რუსული საოკუპაციო ჯარის ნაწილებმა დღეს საჩხერეში შესვლა კიდევ ერთხელ სცადეს. ამის შესახებ ”ინტერპრესნიუსს” საჩხერის რაიონის გამგებელმა ზეურაბ ცერცვაძემ განუცხადა.
”დღეს, 12.00 საათისთვის სოფელ კორბოულთან პოლიციისა და მოსახლეობის პიკეტთან ერთი ჯავშანმანქანითა და სამი ავტომობილით 20-მდე რუსი სამხედრო მოვიდა. ისინი გზის გახსნას მოითხოვდნენ, თუმცა, ჩვენ ვუთახრით, რომ ქალაქში ვითარებას ქართული პოლიცია აკონტროლებს და მათი იქ შესვლის არანაირი საჭიროება არ არსებობს. ნახევარსაათიანი მოლაპარაკების შემდეგ წავიდნენ, თუმცა, განაცხადეს, რომ კვლავ დაბრუნდებოდნენ”, - განაცხადა ზურაბ ცერცვაძემ.
მისივე ინფორმაციით, საჩხერის ცენტრში ამ წუთებში საჩხერისა და ჭიათურის მოსახლეობის მშვიდობიანი საპროტესტო აქცია მიმდინარეობს, რომელზეც რუსული ჯარის გაყვანას მოითხოვენ. როგორც ცნობილია, რუსებმა საჩხერის რაიონში შესვლა გუშინაც სცადეს, თუმცა საპატრულო პოლიციამ ამის უფლება არ მისცა.