რუსეთი საქართველოდან სამხედრო ნაწილებს 18 აგვისტოდან გაიყვანს. აღნიშნული ინფორმაცია გუშინ რუსეთის პრეზიდენტის საიტზე "კრემლინ.რუ" გამოქვეყნდა. საიტის ცნობით, რუსეთისა და საფრანგეთის პრეზიდენტებმა გუშინ ტელეფონით სამხრეთ ოსეთის კონფლიქტის დარეგულირების ექვსპუნქტიანი დოკუმენტის პრაქტიკულ ამოქმედებაზე ისაუბრეს. "რუსეთის ფედერაციის პრეზიდენტმა დიმიტრი მედვედევმა ქართული მხარისგან მისი სამხედრო ნაწილების მუდმივი დისლოკაციის ადგილებზე, ყაზარმებში, უპირობო დაბრუნების აუცილებლობას ხაზი გაუსვა. მედვედევმა ასევე სარკოზის განუცხადა, რომ 18 აგვისტოდან რუსეთი საქართველოდან სამხედრო კონტინგენტის გაყვანას დაიწყებს, რომელიც შერეული საკონტროლო კომისიის მიერ დადგენილ უსაფრთხოების ზონაში დამატებით იქნა შეყვანილი საქართველოს მხრიდან სამხრეთ ოსეთის მიმართ გამოჩენილი აგრესიის გამო",-აღნიშნულია კრემლის ოფიციალურ საიტზე.