საქართველოს გახლეჩას რუსეთი აფხაზეთის ომამდეც შეეცადა და ამ აგრესიის განხორციელებას დღევანდელი ომის პირობებშიც აგრძელებს. იქ სადაც ბომბები არ ცვივა, უნდათ რუსულმა ეშმაკობამ და ხერხიანობამ გასჭრას.
ეს უკანასკნელი კი, მართალია, რომ ისეთივე წარმატებული არ არის როგორც ბომბებით და ძარცვა-გლეჟით განხორციელებული ტერორი, მაგრამ ეს რუსეთს სრულიადაც არ ანაღვლებს.
რუსეთისათვის ახლა მთავარია ”უკეთ დაეხმაროს” ხალხს, ცალკეული კუთხეების უპირატესობასა და თავისი როლის გამოკვეთაში, ანუ როგორც ამბობენ, თვითგამორკვევაში.
ამისათვის სპეციალური ტაქტი შეირჩა ”მეგრული სინდრომი”, რასაც რუსები კარგად იცნობენ და რისთვისაც არაერთგზის მიუმართავთ. დღესაც იგივე მეორდება ზუგდიდში და მის შემოგარენში.
როდესაც ზუგდიდის მაცხოვრებლებს იქ არსებული სიტუაციის შესახებ ვესაუბრებით თითქმის ყველა პასუხი იდენტურია: ”გვეუბნებიან, რომ მეგრელები ვართ და ამიტომ არ გერჩით, დანაშაული ქართველებმა უნდა ზღონ თქვენ რა შუაში ხართ”.
მთავარი ის არის, რომ ხალხს ამგვარი პროპაგანდის არ სჯერა და რუსი ჯარისკაცი დღეს საქართველოს ნებისმიერი კუთხის მაცხოვრებლისათვის მტერია.
არჩილ როგავა, ზუგდიდის მკვიდრი: პირველად როდესაც ზუგდიდში შემოვიდნენ, რამდენიმე ახალგაზრდა შეგვყარეს ერთად და გვითხრეს, რომ ფეხი არსად არ მოგვეცვალა - თქვენ არაფერს გერჩითო.
როცა ვკითხეთ თუ რისთვის დავიმსახურეთ ამგვარი დამოკიდებულება, გვითხრეს მეგრელებს არაფერს გერჩითო. ამის შემდეგ ქალაქი რამდენიმე საათში დავტოვეთ, რადგან რუსებმა იქაურობის ძარცვა დაიწყეს.
როგორც ჩანს ზემდგომი ორგანოებიდან აქვთ დავალებული, რომ ასე ილაპარაკონ და მოგვეპყრან მეგრელებს. რაც ჩაფიქრებული აქვთ და რასაც მიზნად ისახავენ, ამის გამოცნობა დღეს ბავშვსაც არ გაუჭირდება. ახლა როგორც არასოდეს გვმართებს გონიერების გამოჩენა.
| 
